GONELALAI KEI NA TABA GONE (#6954)

I noqu Kalou! I noqu Kalou!

O i au e dua na gone yalowai. Ni vakani au mai e na lomasareni Nomuni veinanumi, susugi au e na uto ni Nomuni loloma titobu, vakavulici au e na koronivuli ni Nomuni veituberi, ka vakatuburi au e na ruku ni yaloyalo ni Nomuni loloma soli wale. Ni kauti au tani mai e na butobuto, ka qisi au me u sa bau dua na cina ramase, vagalalataki au mai e na bula rarawa, ka lesi au me u dua na senikau e na loga ni seni rosi; vakabobulataki au me yaco me u Nomuni tamata e na mata ni katuba ni Nomuni vale ka Mo ni solia vei au na i vakavau ni yalo sa tu vei ira na tamata yalododonu; vakarautaki au me u sa dua na i vakaraitaki ni solisoli uasivi ki na bula vakatamata oqo, ka vakaisalataki au e na i sala vakaturaga ni bula tawamudu!

E dina ga, ni O i Kemuni sa kaukauwa, na iGu Cecekia, na Dauveirairaici, na Dauveirogorogoci.

-`Abdu'l-Bahá
-----------------------

GONELALAI KEI NA TABA GONE (#6955)

O i Kemuni na Kalou! Ni vakatavulici ira mada na gone oqo. O ira na gone oqo erai tei ni Nomuni loga ni kau vuata, na senikau ni Nomuni veibuca, na senirosi ni Nomuni loga ni veisenikau. Me vakatauci mada vei ira na Nomuni uca, me cilavi ira na Nomuni Matanisiga ni Dina e na Nomuni loloma. Me vakabulabulataki ira na Nomuni cagi ni veiceguvi, ka me ra na rawa ni vakavulici, bula ka tubu cake, ka vakaraitaki e na i serau totoka duadua. Sa i Kemuni ga na Dausolisoli. Sa i Kemuni na Dauloloma.

-`Abdu'l-Bahá
-----------------------

GONELALAI KEI NA TABA GONE (#6956)

O i Kemuni na Kalou, Ni tuberi au, taqomaki au, qisi au me u cina ramase ka me u kalokalo serau tale ga. Sa i Kemuni na iGu Cecekia kei na kaukauwa.

-`Abdu'l-Bahá
-----------------------

GONELALAI KEI NA TABA GONE (#6957)

O i Kemuni na Turaga! Qisi koya mada na gone oqo e na veivakararamataki, ka vakadeitaka na tamata dravudravua oqo e na Nomuni veisaututaki. Mo ni solia mada vua na kilaka, vakuria na nona kaukauwa e na kida ni siga ni veimataka lailai ka karoni koya e na ruku ni Nomuni veitaqomaki ka me rawa ni vagalalataki laivi e na valavalaca, me rawa kina ni solia na nona bula ki na Nomuni Cakacaka, ka me rawa ni veituberi kivei ira na lako sese, vakasalataki ira na veilecayaki, sereki ira era vesuki tu vakayalo ka vakayadrata na nodra vakasama na lecaika, ka me ra vakalougatataki e na Nomuni veinanumi kei na veivakalagilagi. O i Kemuni ga na iGu Cecekia kei na kaukauwa.

-`Abdu'l-Bahá
-----------------------

